Курс НБ на 25.04.2018 $68,5725 €83,6722

Премьер-министр Сапар Исаков Бишкек шаардык ЖЭБинин абаны булгоосун төмөндөтүү маселесин иштеп чыгууну тапшырды

Саясат
08 - Январь 2018
www.erkintoo.kg
104

Кыргыз Республикасынын Премьер-министри Сапар Исаков «Улуттук энергетикалык холдинг компаниясы» ААК башкармалыгынын төрагасы Айбек Калиевге Бишкек шаарынын ЖЭБинин абага гүлдү жана катуу бөлүкчөлөрдү бөлүп чыгаруусун төмөндөтүү маселесин иштеп чыгууну тапшырды.

Өкмөт башчы белгилегендей, акыркы кездерде борбордун тургундары Бишкектеги абанын булгануусу боюнча адилеттүү сын билдирүүдө. Буга байланыштуу абалды өзгөртүү үчүн тийиштүү чараларды кабыл алуу зарыл.

«Улуттук энергетикалык холдинг компаниясы» ААК маалыматына ылайык, «Бишкек шаарынын ЖЭБин модернизациялоо» долбоорун ишке ашыруу алкагында түтүн газдарын тазалоочу жаңы блоктор курулган.  Тазалоо эки камералуу жана беш тазалоочу талаасы бар электрофильтрдин жардамы, ошондой эле өлкө боюнча аналогу жок түтүн газдарын күкүрттөн тазалоочу тутумдун эсебинен жүргүзүлөт. Мында түтүн газдарын катуу бөлүкчөлөрдөн 99%га тазаласа, күкүрт кычкылынан 97%га дейре тазалайт.

Түтүн газдарынан тазалоо тутуму эл аралык стандарттарга шайкеш  долбоорлонгон. Эски үлгүдөгү буу казан агрегаттарына түтүн газдарын катуу бөлүкчөлөрдөн тазалоочу электр фильтрлери орнотулган.

2017-жыл үчүн электрофильтрлердин пайдалуу коэффициентинин орточо көрсөткүчү кичи от казан агрегаттарында – 87% чейин (1961-1968-жылдары ишке киргизилген) жана чоң от казан агрегаттарында 93% чейин (1970-1989-жылдары ишке киргизилген) көрсөкүчтү түзгөн. Ошол эле учурда эски от казан агрегаттарында даярдоочу завод тарабынан түтүн газдарын күкүрттөн тазалоочу тутуму каралган эмес.

Айбек Калиев маалымдагандай, эски от казан агрегаттарынын абага бөлүп чыгарууларын төмөндөтүү үчүн тийиштүү иликтөөлөрдү жүргүзүү жана курулуш-монтаждоо иштерин өткөрүү менен түтүн газдарын кошумча тазалоо боюнча долбоор иштеп чыгуу зарыл.

Белгилесек, абага зыяндуу заттарды бөлүп чыгарууну төмөндөтүү максатында 2017-жылдын декабрь айында Бишкек шаарынын муктаждыгы үчүн автобустарды алууну каржылоону уюштуруу жөнүндө Меморандумга кол коюлган. Жаңы автобустар 2018-жылдын экинчи кварталында алынып келинет.

Премьер-министр Сапар Исаков белгилегендей, аталган долбоордун өзгөчөлүгү – алынган автобустар газ аркылуу жүрөт.

«Жасалган кадамдар Бишкек шаарынын экологиялык абалын бир кыйла жакшыртууга мүмкүндүк түзөт», – деди Өкмөт башчы.



Комментарийлер

Эч бир пикир жарыялана элек

Posting comments after 3 месяца has been disabled.