Курс НБ на 18.09.2020 $78,9597 €93,1961

Премьер-министр Кубатбек Боронов: Банктар айыл чарбасын каржылоого багытталган мамлекеттик программаларды элге жеткиликтүү тилде түшүндүрүү керек

Саясат
14 - Сентябрь 2020
www.erkintoo.kg
28

Финансылык уюмдар аймактарды өнүктүрүүгө, айыл чарбасын каржылоого багытталган мамлекеттик программаларды элге жеткиликтүү тилде түшүндүрүү керек. Бул тууралуу Кыргыз Республикасынын Премьер-министри Кубатбек Боронов Жалал-Абад облусуна жасаган жумушчу сапарында Аксы районунун Кербен шаарындагы «РСК Банкынын» өкүлчүлүгүнүн ишин күтүүсүздөн текшерип барган учурда билдирди.

«Банктын имаратынын алдында турган тактачада мамлекеттик  программаларды каржылоонун жол-жобосу так, түшүнүктүү жазылып туруш керек. Бул иштер банктын филиалында жетиштүү деңгээлде аткарылган эмес. Жөнөкөй жаран банкка келип,   мисалы, «Айыл чарбасын каржылоо - 8» программасынын алкагында берилүүчү насыя алайын десе, кайсы документтерди топтоо керектиги боюнча элементардык маалымат көрүнбөйт. Ушундай майда нерселер жарандардын нааразычылыгын жаратат», - деди Өкмөт башчы.

Ошондой эле Премьер-министр кеңседеги санариптештирүү багытындагы иштерге карата сын айтты. 

«Кыргыз Республикасынын Президентинин демилгеси менен жарандарга кызмат көрсөтүүлөрдү алуусуна шарт түзүү үчүн санариптештирүү саясаты активдүү жүрүүдө. Бюрократияны азайтуу, коррупциянын алдын алуу боюнча аракеттерди көрүп жатабыз, жетекчилерден бул боюнча маалымат алганыбызда баары жакшы дешет. Бирок күтүүсүздөн текшере келгенде кемчиликтер чыгууда», - деди Кубатбек Боронов.

Премьер-министрдин айтымында, мамлекеттик программалардын алкагында насыя алуучулардан талап кылынуучу документтердин үчөөсү гана кагаз  түрүндө, калгандары «Түндүк» электрондук мекемелер аралык өз ара аракеттенүү системасы аркылуу алынат.

Өкмөт башчы бул шарттарды банкка келген насыя алуучуларга так түшүндүрүү зарыл экенин кошумчалады.   



Комментарийлер

Эч бир пикир жарыялана элек

Комментарий кошуу